Ahhh Nonqane!!
Inkos' am ngumfusa ka-Rhili,
Isixabela sentombi yakwa-Thato, Isixabela besoyika ngamehlo, Singazange sanento phofu.
Nguso-Manangashe, indlov' edl' igoduka,
Umavuth' ukuhamb' axelis' umlilo, Umathweth' ukuhamb' axelis' inyanga, Umagongq' ukuhamb' axelis' ilanga.
Intw' entsente zilukhuni ngathi licangci, Ngathi licangci lase-Mlungwini.
Ne ngcuka yase Bathenjini ikhe yajwaqa yaphuk' amenyo.
Ndith' ovuk' emini akabonanga nto, Kub' akayibonang' inamb' icombuluka.
Yaphuma lankwenkwezi ise-Mbangcolo kuyasa, Yaphum' inkwenkwez' emapoliseni kuyasa,
Yaphuma lankwenkwezi phezu kwe-Bende kuyasa, Watsh’ umlil 'emantlok' o-Mndundu kuyasa.
Ngubanina lo undithuka ndihleli,
Ndenziwa umva kwendlu ndingumtshana, Ndingumtshana wentombi yakwa-Thato.
Nants' into eyakhama kwatshon' inyanga,
Bayawathi sisimang' abase-Maxhoseni.
Ngu-Ngindizayo umhlophe ka-Rhili,
Intw' enenkunz' ebomvu eyizuze ku-Phalo, Ezek' ezakulo-Nozwane yaziyek' ezakulo-Yakupha zazi gudu.
Nants' int 'enentong 'emnyam 'engaziwa-Mxhosa; Nants' int' enzipho zimnyama kukuphand' uhlanga, Ngalonyakana kwa-Gcaleka zadliw' inkomo; Intw' efanelwe linxuwa elikwa-Nkunzimbini.
Ngunxuwa le-Cawa lif 'amathole,
Liba nelang' elase-Nkumandeni.
Ngu-Gomb' ithamsanga alifak' esiqwini, Intw' emzimb' unencwina ngathi luhlanga, Intw' engalo inekhulu lamadoda.
Ndithi ngu ngqina yemfengu ka- ngcayechibi. Kwabekw' u-Maphasa wenziw' igosa. Kwavuk' inyath' emazants' e-Bengu, Yaliqgib' ilizwe ngokunyelela.
Ngu rhamncwa alivelwa ngasemva, Nabalandayo babetha besothuka, Nakwa-Khonjwayo emaMpondweni likhe labonwa, Zaloyik' izizwe zahlabelana; Watshon' emhlabeni kwadade wabo, Kwafik' u-Gcaleka kwafik' uPhalo,
Wawathyal’ ama-Mfengu asinga kwa kwa-Tshaka, Kulaph’ imikhosi yatshabela khona;
Inxalenye yabheka kwa-Molose elu-Suthu, Kulaph' imikhosi yatshabela khona.
Yingwe yethunzi umfusa ka-Rhili, Iyabalek' imizana yakowabo, Yoyik' ukutshiswa libandezi. Ngumntan' enkosi umzimb' uyaqhuma. Onondayi bahlal' e-Ngqubusini,
Onondayi bakhangel' ukuhla kuka-Mhlontlo, Uyazondwa ngowasem-Lungwini, Ubulel' u-Hope ebehleli naye. Nguzwi-linzima elibizwa phakathi, Uxhalis' imantyi ngokuphendula.
Bendifudula ndimdel' umlungu, Kanti yindod' iqhel ukuphendula. Ntetha zikhethwe li-Tsonyana, Usisi xhaso somhlaba nezulu.
Kukhal' amaqhawe ngase-Mandluntsha;
Izizwe zonke zikwalatha ngezinti.
Sakha saba 'ma-Bomvana likhaya,
Suka seva sekulilwa singazi lutho, Kwaf' oka-Ngezane noka-Mfunze, Ngalemini kwaliwa elu-Vulweni. Mntan' enkosi ongathethi zinkcuku, Ngena Sithatha, ungenil’ u-Manxiwa, Kuthiwa bayoyika babekhe babinza, Ngalemini kwaliwa nge-ntlalelwano nama mfengu e-Bika.
Yint' emlom' umbi njengoka-Mbhoxwana, Ungamthethel’ umnt 'angabuy 'asinde.
Ngu-Gcaleka wathwasa ngomlambo;
uVimba wenkomo, bayakudel' abant 'abakukhonzayo. Koko ke wen' ubaxaka ngelizwi, Uthi no-Rhili akadumanga kusekh' u-Hintsa.
Hay' u-Ngqika owanqand' umlungu!
Owabeth' ama-Mfeng' ahamba nge gunya, Asiphangele kakade asing' emandleni, Ebekhe akucela abuy' anqandana, Kuba kaloku ubuya kuwabetha ngesithunzi adangale.
Wakha wawanceda mhla ngo-Tshaka,
Uyabona-ke ilizwe aligqibile,
Emi nge-Cwecweni ema nge-Ngquthu.
Angxamel' ukusinga kwasemva e Natala, Eva kusithw' umhlab' uxolile, U-Tshak' unqandiwe ngu-Somtsewu.
Mang' angalingisa kulo ka-Hena, Abek' amabele kulo ka-Khwaza.
Ningab' izibond' ezi niyazibulisa na?? Ezi zama-Mfengu nezasema-Xhoseni??
Ke kambe ziyawugqwetha lomhlaba ka-Phalo.
Zifumen' abantu ngo Ngca-Yechibi, Zingabazuzanga ngo-Mlanjeni,
Zingabazuzanga ngempi ye-Zembe.
iNamb' enentsente yakulo-Nongqoloza,
Ayiqheleki kwizinci zakowayo, Ayiqheleki kumacal' akowayo.
Yinkos' engenagosa lithethayo, Ngumntan' enkosi ufuze kulonina;
Ngumbulali wenkongo ka-Menziwa, Mhla ngalemini nga-Mangolothi.
Ngumdaka wo-Nohute wenkosikazi,
Ngu sihogo bangaze beyele mhla kuthethwayo.
Uthetha ngelidala ngelika-Hintsa.
Ndabetha ngomnqayi ku-Madolo no-Sijako, Umntan' enkosi angaphekelwa nkobe, Afel' enkundleni kowakwa-Ngqila.
Ndiyakubulela nyana kama-Gisha, Umntan' enkosi ukumsez' amanzi.
Ndithi yinkunz' ezikhwelayo, Iyawakhonya nezisihla zodaka, ikhonyel' inkunz' ezise-Rhini,
Ziyawathakazela kwimizan' eyoyikayo.
Yint' eyahlab' enkundleni lasibekela.
Umntan' enkos' intliziyo lixhego, Uz' uwagcin' amaqadi akokwenu, ilunda lakho ngowakulo-Mtoto, Izwembezi ngowakulo-Yekanye;
Ngu nkunz' inamandla ngenyama zayo.
Ndiphuph' u-Sigcawu endinik' inkunzi, Kant' amaphuph' ayandishwabulela, Kuthe kwakusa ndadana kwakubi;
Kwesuk' u-Khawuta, kwesuk' u-Nqoko,
Bathi ni mnik' iduna sisi alam,
Ngasemv' usapho luyalamba,
Kant' inkosi zam ziyandithethelela.
Ndithi, lilunga lom-Tsheko into ka-Rhili,
Ndithi, lilunga lento ka-Ntaba.
Lu qwang' olulushica, olutyiwa zingcuka nengonyama,
Kanti nhoko azisokuze zilugqibe.
Yintw' engalo ifanelwe ngumnanaso.
Ndithi, ngubamb' ingwe ngentamo,
Afik' ama-Xhosa seyipholile.
Bayawaxhal 'abantu bezixhotyana,
Baw' ondizalayo!!
Ahhh Nonqaaaaaane!!
Comments
Post a Comment