Apha kwa Xhosa lento ibubukhosi nokulawula asinto imele amaTshawe kuphela. IKumkani nee nkosi zayo zonke ngokushiyana nangokulingana kwazo zinamaphakathi wazo; iqela lamadoda asisigqeba, iqoqo ne Bhunga. Ngala madoda adibana rhoqo eBhungeni axoxe izinto ezidla umzi. Ke kambe; njengobukhosi obamiselwayo, nobuphakathi nhabo bamiselwa xeshikweni kwakumiselwa ubukhosi, into ethetha ukuba ayinguye nabani na ongaba liphakathi lasebukhosini, nanjengokuba ingenguye nabani na onokuthi azifumane eyi nkosi okanye iKumkani. Ngeli phandle, ubuphakathi bulu xanduva lwemizi eyayimiselwe kwa mhla mnene xeshikweni kwakumiselwa ubukhosi. Kule mihla siphila kuyo sele sibona oosopolitiki, abatyali zimali besondele kakhulu ezinkosini nakwi kumkani zethu; sibona awona maphakathi wesizwe ebhekelisiwe embusweni wobukhosi. Akungebi bethu yeyona nto le eyenza ukuba ubukhosi bakowethu sibubone budodobala? Ngoba ke enyanisweni abusena mandla kwaye nee nkosi ne kumkani zethu sizibona kumatheko nakwi minyhadala yasebu rhulumenteni kuphela, sive koo nomathotholo nakuma phephandaba sele kusithwa umntwanenkosi akasekho. Nhakwi nkqubo yokubekwa kwenkosi nee Kumkani asiwaboni amaphakathi akwa Xhosa ethatha nxaxheba, sele lento iyinto yabantwana bako mkhulu namagosa aseburhulumenteni kunye nabefundisi bakwa Lizwi; kanti hayi mandulo bekungenjalo. Ubuphakathi buyenye yee ngalo zo mbuso no mthetho wasebukhosini obaluleke ngeyona ndlela. Eyona yenza umdla kuyo yonke le nkqubo ekuyiyo kule mihla kukuba: amagosa aseburhulumenteni (governors) nabafundisi bakwa lizwi (missionaries) bangamaziko ayephambili kakhulu ngexesha lobukoloniyali, amaziko awayesetyenziselwq ukubulala nokudodobalisa ubukhosi, kwanoku gutyula indlela yokuphila yamaXhosa, amasiko nezithethe zawo; Kodwa ise kwangawo lamaziko na namhlanje abekwe phambili kwii nkqubo zako mkhulu, sibe phofu sikwixesha apho kusithwa sikhululekile kwi ngcinezelo naku makhamandela obukoloniyali. Ungabona xa kusombathiswa umntwanenkosi; abefundisi bakwa lizwi bebambe inkosi entloko beyithandazela, oo sopolitiki betshila, be ndolosa enkundleni yako mkhulu, begaya iivoti, besenza izithembiso ezingasokuze zifezekiswe kulowo nalowo ubukeleyo. Mhasivumelaneni mawethu ukuba ubukhosi bakowethu abusayi kuphinda bube namandla amaphakathi akowethu (ooMajwarha, ooMantakwende, oomaGiqwa, ooMangwevu) ebekelwe kude ngoluhlobo ebukhosini.
Mhasikhe sijonge uluhlu lwawona maphakathi aphambili akwa Xhosa esiwaqondayo nawayemiselwe kwantlandlolo ngabadala nee ngqondi zesi sizwe, nebekumele ukuba ngawo adakasa koo Nqadu nakoo Mngqesha exoxa izinto ezidla lo mzi ka Xhosa. Awaphelelanga apha, xa sinokuwabala wonke kungatshona ilanga, kodwa aphambili nanga:
Kwa-Gcaleka
Le yindlu nkulu ka Xhosa wonke; ikhutshwa apha imithetho ebhijela isizwe sonke, izigqibo zithatyathwa apha, izibheno zamatyala zakulo lonke elasema Xhoseni ziziswa apha, nee mbambano okanye iingxabano eziphakathi kwee nkosi zasema Xhoseni zikwa ziswa apha, zisonjululwe yi Kumkani namaphakathi wayo kukhutshwe isigwebo esinga tsitywa nayi Kumkani uqobo.
Sijako - u Sijako yinto ka Bhacela, u Bhacela yinto ka Khwaza, u Khwaza yinto ka Ngqila, u Ngqila yinto ka Wohle, u Wohle ngoka Thotywayo, u Thotywayo ngoka Hintsathi iKumkani yesizwe samagiqwa esaginywa ngu Tshiwo. Ngama Giqwa la, ooJikijwa, ooMvaba, oo Thotywayo, ooHleziphondo, ooMagqab'angadliwa nazibhokhwe. abantu bakwa Sijako ema Giqweni ngama phakathi amakhulu walaph' emaXhoseni alandela uKhwane inkosi yama Gqunukhwebe, lowaa wayesebenzel' ubukhosi xa ukumkani uPhalo wayesilwa noMjobi inkosi yama Gaba. Zizinto ezi ebezimele ukuhamba phambili e Nqadu, nemicimbi yolwaluko lwamakhwenkwe wesizwe samaXhosa iphathwe ngabo, ingakumbi kweli xesha apho sijongene nenyhikihtya yokufa kwaba khwetha. Hazuba waya kutshona phi umzi ka Sijako; Magiqwa umkhosi wakwa Xhosa owawusaziwa ngokuba yi Ntshinga wawuphethwe nini, ikwanini aba be butha amakhwenkwe niwadidiyela, niwafaka ebudodeni khon' ukuze abe ngabakhuseli namakhaka eli lizwe lamaXhosa; natshona ngaphi umzi ka Gcaleka sele ugquba iimpungutye nje?
Rhuneyi - u Rhuneyi yinto ka Qeqe, u Qeqe yinto ka Ganya, u Ganya yinto ka Mpulu. Ngama Ngwevu la; ama Rhudulu, oo Mhlatyana, ooTshangisa, oo Sikhomo, oo Nxuba, izinto ezithandwa xa kukubi. Lo Mzi yayinguwo owawune xanduva lokuqokelela inkomo ku mzi no mzi wase Maxhoseni xa iKumkani izaku lobola inkosikazi ye ndlu enkulu - ukutsho oko umfazi oyakuzala eyona Kumkani yamaXhosa wonke; Xa zibizwa ezinkomo kwakuthwa li Sizi. Yayikwa ngulo mzi owawuno xanduva lokubutha amakhwenkwe, uwabuthele ku mkhosi wakwa Xhosa ekuthwa li Qawuka. Yayikwa ngulo mzi owawuno Tshawe uqobo lwakhe mhla efunza impi yakhe kuba khuluwa bakhe oo Cirha noo Jwarha noo Qwambi; Kazi amaNgwevu aya ngaphi njengoba sele yeyele ngo mkhono nje ko mkhulu.
Zii nduna ezi nkulu ke ezi zasema Xhoseni; enye ekwa nkulu elandela u Rhuneyi ngu Gwatyuza umfo ka Njimbane - u Faku isiduko, uno mninawa wakhe u Wholela lo kuthiywe ngaye ilali yaku Centane ekude kufuphi e Gcuwa; abantu baku Centane baya kuyazi loo Lali yaku Wholela. Omnye umphakathi ke owalekela la maphakathi angentla ngu Msasa into ka Tatsi emaNdluntsha emaNkabaneni kwa Majeke.
Kwa-Rharhabe
Kwa Ngqika, kwa ndlunkulu ka Rharhabe, ukunene bobu Kumkani buka Xhosa wonke. Lo mzi usisandla sokunene ebu Kumkanini buka Xhosa; ngulo mzi ogabulela izigcawu ikomkhulu lesizwe samaXhosa. Kwii mfazwe eziluthotho amaXhosa ayezilwa nama Ngesi, ngulo mzi owawuphambili, injalo nje wayidlala indima yawo wayifeza. Alapha amaQhawe angasokuze alibaleke kwimbali yamaXhosa, xa kuthethwa ngembali yamaXhosa ayingekhe iphelele xa lo mzi ungakhange ukhankanywe; Xa uthetha ngama Rharhabe uthetha ngama Ngqika, ama Ndlambe, imiDushane, ama Jingqi - amaJingq'angevayo, ama Ntinde, ama Hleke, ama Mbalu, imiDange, u Mngcangathelo, ama Toyise, imi Qhayi nama Gqunukhwebe njalo njalo. Lo mzi nawo unama Phakathi akwabaluleke ngeyona ndlela embusweni wamaXhosa, mhasikhe sijonge awona maphakathi ebekumele ukuba ayadakasa andolose e Mngqesha.
Thyala - Ayikho induna engaphezulu kuka Thyala kuma Rharhabe; u Thyala yinto ka Nteyi, u Thyala uzele u Ntsangani, u Ntsangani wazala u Mhlontlo (Hayi lo uyi Kumkani yama Mpondomise malawu ndini), u Mhlontlo ke yena uzele u M' moshi, waza u M' moshi. Ngama Dala la isiduko sawo; Lo mzi usuka kwa Bomvana waza wathi ngokufuduka kwa Gcaleka waya kuma kwa Ngqika, wathi kuba u Nteyi yayingumfo ohlakaniphileyo wazifumana engu mphakathi omkhulu walapho kwa Ngqika. Nanko lo mzi kule mihla ku Centane kwilali yase Nxaxho, nekulapho wathi wabekwa khona xeshikweni amaNgqika egxothwa kwilizwe lawo ngama Ngesi emva kwe mfazwe ka Ngcayechibi. Nibahle nonke MaDala, miGanu, boo Tyala ka Nteyi, ooBhulorho ayiwelwa iwelwa ngama Dala kuphela; umzi ka Phalo uyabudinga ubu nkokheli nobu kroti benu - u Vululwandle umntaka Sandile uyedwa ngaphoshonono kwe Nciba, urhangqwe zii mpungutye, nama Xhalanga aya ndanda phez' ko Mngqesha.
Soga - u Soga uzele u Festile, waza u Festile wazala u Henry, u Henry yena uzele u Joni, waza u Joni wazala u Somana. Ngama Jwarha la, oo Mtika, oo Mazalani, oo Khatiti, oo Jotelo, oo Soga, oo Ndabase, izinto ezintle nhokuba sele zipheth' izikhali; izinto zika Mbelu, zika Mnangwe, ooMabunjw'ebhidlika njengo daka. Nanko lo mzi ngezi mini kwilali yase Gobe ku Centane. u Jotelo uyise ka Soga wawa ngo 1819 kwi dabi lase Malinde, esilwela u Ngqika inkosi yakhe eyayigezile - kwathi kuba izifungo zizifungo wayilwela inkosi yakhe wayifela, akuba eyiphe la mazwi "Khangela ke mfo ndini siya kulwela wena ngoku, siyokufela wena ngenxa yokugeza kwakho; ooNyana bethu baza kukhula bengenabo oo Bawo - uzubagcine". Angakhala zome u Jotelo xa enokuvuka, abone umzi wenkosi yakhe udlala oo sopolitiki; Majwarha naya ngaphi?
Qukwana - u Qukwana uzele u Nxokwana, u Nxokwana wazala u Mboyi, u Mboyi wazala u Ndesana, u Ndesana wazala u Mlawuli. Ngama Ntakwenda la, oo Libele, ooQukwana, ooMboyi, ama Letha. Nanko lo Mzi ngezimini kwilali yase Msento ku Centane nokulapho wafuduselwa khona ngama Ngesi emva kwe mfazwe ka Ngcayechibi ngo 1878. U Qukwana wayeno Jotelo wase Majwarheni kwi Dabi lase Malinde ngo 1819, bawa kunye apho bebulawa ngu Ndlambe no Hintsa, befela lo mzi ka Rharhabe.
enye induna yakwa Rharhabe nguGaqa, yena uzele uNzima, u Nzima wazala uHokisi, uHokisi.Nango ke amaphakathi amakhulu akwa Sandile; ukanti alandela lawo ngu Vuso ozele u Zimasile, uphaya eQombolo kwilali yaku Centane. Omnye ngu Geza ozala u Sifingo, nhaye nhanko kwase Qombolo kwilali yaku Centane. Olandela lowo ngu Falakhe, yhena use Ngcizela ku Centane. Ngamaphakathi amakhulu akwa Rharhabe lawo.
Xa sisenjenje ke sicacisa ubukhosi basemaXhoseni; nhoko ukho omnye umndilili wama Phakathi kodwa la ngawona makhulu macala omabini, kwa Gcaleka nakwa Rharhabe. Nanjengoko besitshilo, ubukhosi basemaxhoseni asiyo nkosi yodwa kuphela, inee Nduna zayo nhazo ezilawula nayo; ubukhosi basemaXhoseni bunee nduna, buyalawulwa, bune qumrhu eliphantsi kobu Khosi okanye eliphantsi kokumkani elingumlomo wakhe. Nhaxa kusiza u Rhulumente esiza ko Mkhulu, i Kumkani okanye inkosi ithetha into egqitywe li qumrhu layo; hayi le yale mihla apho sibona khona amagosa ka Rhulumente ingawo akhokele ikomkhulu. Mhawabuye amaphakathi akowethu athabathe iindawo zawo, konakele kakhulu.
Comments
Post a Comment