Amagama wee Nkabi zee Nkosi

 

Kwa-Xhosa inkomo yinto exatyiswe kakhulu ngoba kuphilwa ngayo; isiko lenziwa ngayo, amasi la siwathanda kangaka aphuma ku bisi oluvela kwezi nkomo, iimfele zokwambatha, izikhaka zokubhinqa zoo Mama, iintambo zokubopha zikwenziwa ngezikhumba zezi nkomo, amasimi alinywa kwangezi nkomo kuvele ukutya, amatyala ahlawulwa kwangezi nkomo, ukanti nobuhlobo bukwakhiwa kwa ngazo.

iiKumkani, iinkosi, izibonda namanye amadoda ke azizityebi ebeba neyona nkabi ayithandayo kule mihlambi yawo; ze imizi yawo ayithiye ngegama laloo nkabi, kuthi ngamanye amaxesha isizwe seNkosi sithiywe kwange gama laloo nkabi yayo. Umfundi angazibuza ukuba yintoni isizathu soku? Kaloku esiXhoseni kuyahlonitshwa, inkosi ne Kumkani ayibizwa ngegama njengalento ikhoyo ngoku yabantu ababiza abantu abakhulu nabahloniphekileyo ngamagama.

Nanga amagama wee Nkabi nemizi yasemaXhoseni

Kwa Gcaleka (iKomkhulu Lama Xhosa wonke)

·        Eka Kumkani u Tshiwo ngu Mngqalasi – umzi wakhe kuse Mngqalasini, ungcwatyelwe eNgcwanguba.

·        Eka Kumkani u Gcaleka ngu Mtshayelo –  kodwa umzi wakhe wawubizwa ngoba kukulo Tete, nanamhlanje oku amaGcaleka kuthwa ngama Bandla akulo Tete. Ungcwatyelwe eNxarhuni (Nahoon) eMonti.

·        Eka Kumkani u Khawuta ngu Gojela, umzi wakhe kukulo Gojela. Ungcwatyelwe eMnyameni ku Centane.

·        Eka Kumkani u Hintsa (ahh Zanzolo) ngu Mali – umzi wakhe kukulo Mali. uNgcwatyelwe e Nqabarha ku Gatyana.

·        Eka Kumkani u Sarhili (Ahh Ntaba) ngu Thiso – umzi wakhe kukulo Thiso. Ungcwatyelwe e Sholorha kwa Bomvana

·        Eka Kumkani u Sigcawu (Ahh Nonqane)  ngu Zulu – umzi wakhe kukulo Zulu. uNgcwatyelwe e Mngazana ngase Mampondweni.

·        Eka Kumkani u Bhungeni (Ahh Zwelidumile) ngu Ngqaqeni – umzi wakhe iNqadu kukulo Ngqaqeni. Ungcwatyelwe e Nqadu ku Gatyana.

 

Kwa Rharhabe (uKunene kukaXhosa)

·        Eka Nkosi u Rharhabe (ahh Butsolobeentonga) ngu Nzwilanga, ntonje igama eliye la gqama leli lithi Nomagwayi; uNomagwayi wase Mbo. "Ayiwela iXuka amabandla akulo Nomagwayi, uNomagwayi wase Mbo; esingise imibombo emaQwathini eya kudla inkomo zabaThembu" - SEK Mqhayi. uButsolobeentonga uNgcwatyelwe eXuka emaQwathini, apho wawela khona ebulawa ngama Qwathi ekunye no nyana wakhe u Mlawu.

·        Eka Ngqika (Ahh Lwaganda) ngu Mbombo, umzi wakhe wawubizwa ngokuba kukulo Mbombo, amaNgqika kunanamhlanje asabizwa ngokuba ngama Mbombo. Ku Centane kwilali ezithile lisasetyenziswa kakhulu eligama kuba iselapho ingxenye yamaNgqika eyawezwa iNciba ngama Ngesi emva kwe mfazwe ka Ngcayechibi (9^th Frontier war) ngo 1878. uNgcwatyelwe eMkhubiso, e Xesi.

·        Eka Sandile (Ahh Mgolombane) inkosi eNkulu yamaNgqika namaRharhabe ephela ngu Mbede, umzi wakhe kukulo Mbede. uNgcwatyelwe kwa Zidenge.

·        Eka Maqoma (Ahh Jongumsobomvu) unyana wendlu yase Kunene ka Ngqika, igama le nkabi yakhe ngu Jingqi, ikomkhulu lika Maqoma lalibizwa ngokuba kukulo Jingqi, abantu bakhe ze ibe ngamaJingqi; amajingqi angevayo. Kuzo zonke iimfazwe eziliwe ngamaXhosa namaNgesi, owona mzi ubuphambili kakhulu, no mzi obusoloko uphambili kumadabi okulwa umlungu ibingama Jingqi la. Ibiba ngu mzuzwana elasemaXhoseni lixolile, kuhleliwe ngoxolo, uve sele kusithiwa izwe lifile, zibambene ngazo Kulo Jingqi; ibeyilonto ke umzi wonke waseMaxhoseni ube nawo uyangena kanjalo kwimfazwe. Lo mzi ka Maqoma ubume e Bhofolo, esingqengqeni, ukukhweza ukuya kuma koo Khobonqaba (Adelaide). Nawo amaJingqi awasindanga ekugxothweni ngamaNgesi emva kweka Ngcayechibi ngo 1878; awezwa asiwa ku Centane, yiyo lonto lixhaphakile elogama lamaJingqi unanamhlanje kulo mhlaba waku Centane. Wakhothamela e Robben Island eKapa ngo 1876, wangcwatyelwa khona, aze amaJingqi aphuthuma amathambo wakhe ngo 1978, wabekwa kwa Ntaba ka Ndoda e Xesi.

iNkosi enkulu yaseKunene u Vululwandle ku Mzi ka Rharhabe ne Kumkani ka Xhosa wonke u Vulikhaya kwa Gcaleka asikaweva amagama eeNkabi zabo; ozaziyo angeza ngaphambili asixelele. 

Kodwa okwangoku mandibe ndisithi hlalani nibahle njalo nina baka;

Somanangashe, iNdlov' edl' igoduka,

u Mavuth' ukuhamba axelis' umlilo.

u Mathwethw' ukuhamb' axelis' inyanga,

u Magongq' ukuhamb' axelis' ilanga,

into entsente zilukhuni ngathi li cangci,

ngathi licangci lase mlungwini.

ngu Ngindizayo umhlophe ka Rhili,

Yint' enenkunz'ebomvu eyizuze ku Phalo ezek'ezakulo Nozwane

yaziyek' ezakulo Yakupa za zizi Gudu.

ndithi yint'ene ntong'emnyama engaziwa mXhosa,

int'enzipho zimnyama kuku phand'uhlanga,

nyakana zadliw' inkomo kwa Gcaleka,

ingwe ye Thunzi, umfusa ka Sarhili.

Ahh Nonqane!!!

ngu Sigcawu ke lowo; into ka Rhili ka Hintsa ka Khawuta ka Gcaleka ka Phalo, emaTshaweni.

maXhos' amahle!!

·